Allir á völlinn!

Það hafa ekki verið margir "stórleikirnir" í 1.deildinni í sumar en á morgun fer fram sá stærsti hingað til í það minnsta þegar við Þróttarar tökum á móti efsta liðinu, Grindavík. Ég tel möguleika okkar nokkuð góða- allir fit- nema að sjálfsögðu Daninn knái. Það ætla aldeilis að reynast frábær kaup...Allavega skora ég á fólk að mæta og hvetja röndótta liðið til sigurs.

Allt fínt að frétta úr vinnunni. Virkilega góður andi ríkir í Útvarpshúsinu og allir boðnir og búnir við að aðstoða nýliða eins og mig. Sem veitir ekki af þar sem ég er enn að ná tökum á þessu öllu saman. Aðeins flóknara en maður taldi í fyrstu að lesa 2-3 mínútna texta svo vel sé. Það er að mörgu að huga sem maður áður tók sem sjálfsögðum hlut. Maður getur víst lítið gert að því hvernig röddin í manni hljómar dagsdaglega en það skiptir kannski ekki öllu máli heldur. Að vera skýrmæltur, ekki lesa of hratt, halda tóninum í röddinni jöfnum og góðum og alls ekki hljóma eins og þú sért að lesa af blaði (!?!) Það tekur tíma að komast upp á lagið með þetta. Ég hef svosem ekki miklar áhyggjur enn sem komið er og fyrst hinn ofursvali Broddi Broddason gerði sér sérstaka ferð á borðið til mín í gær til að bera lof á frammistöðu mína (auk nokkurra góðra ráðlegginga um hvernig má bæta þá hluti sem eru að) þá líður mér bara ágætlega með þetta allt saman.   

Ég ætla ekki að stíga í þann fúla pytt að kommenta mikið á KR-inga þessa stundina, nóg er víst komið. Má hinsvegar til með að lýsa ánægju minni með minn mann hjá vesturbæjarstórveldinu, G.J. sem fór hamförum í sjónvarpinu í gær. Ef sú ræða sem kafteinninn þrumaði þar (með miklu líkamlegu látbragði ) vekur ekki liðsmenn þessa félags til lífsins þá er þeim varla viðbjargandi. En Gulli minn, sparaðu svona tímamóta viðtöl þangað til ég er með míkrafóninn í hendinni ;) 

Athugasemdir

[Jón Ólafsson (IP-tala skráð) 1.9.2007 kl. 20:59]

Til lukku með karaktersigurinn í kveld gegn Grindavík. Sanngjarnt og allt það. Ekki ofmetnast þó því þið þurfið að taka Þórsarana á fimmtudaginn til að gulltryggja sætið í efstu deild. Koma svo! Jón Ólafs